ပြီးခဲ့တဲ့ အပတ်က Sodium Hypochlorite နဲ့ ရေသန့်ပြုလုပ်နည်းကို ဖော်ပြခဲ့ပြီးဖြစ်ပါတယ်။
ဒီတပတ်မှာတော့ High-test Granular Calcium Hypochlorite ( HTH ) နဲ့ ရေသန့်ပြုလုပ်နည်းကို ဖော်ပြပေးသွားမှာပါ။
ပထမဦးစွာ သောက်ရေအတွက် အသုံးပြုမည့်ရေကို ရေကန် ၊ မြစ်၊ ချောင်းထဲကနေ ခပ်ပီး အနည်ထိုင်ထားရပါမယ်။
အနည်ကျသွားပီး ရေကြည်လာလျှင် အခြားပုံးတခုထဲ ရေကြည်တွေကို ခပ်ထည့်ပေးပီးမှ ရေသန့်ဆေးမှုန့်ထည့်ဖျော်ပေးရပါမယ်။
မှတ်ချက်။ သောက်ရေအတွက် အသုံးပြုမည့်ရေသည် နောက်နေပြီး ပျစ်နေပါက ရေသန့်ဆေးထည့်သော်လည်း ရေမသန့်နိုင်ပါ။ ဒါကို သတိထားပါ။
ရေသန့်ဆေးမှုန့် ခပ်နည်း ( Calcium Hypochlorite )
အဆင့် ၁
Calcium Hypochlorite ဆေးမှုန့် လ္ဘက်စားဇွန်း အမောက် တဇွန်းကို သောက်ရေသန့်ပြုလုပ်မည့် ရေ ၂ ဂါလံ (၉ လီတာ ) ထဲကို ထည့်ပါမယ်။ ဆေးမှုန့် တွေ ပျော်ဝင်သွားအောင် မွှေပေးပါ။ ဆေးဖျော်ရည် ရပါပြီ။ သောက်ရေ အတွက် ရေသန့် မဖြစ်သေးပါ။ လေဝေင်လေထွက် ကောင်းသော နေရာတွင် Face mask နဲ့ Eye glass များ ဝတ်ဆင်ပြီး ဖျော်ရပါမယ်။
အဆင့် ၂
ဒုတိယအဆင့်ကလည်း လွယ်ပါတယ်။ အဆင့် ၁ မှာ ဖျော်ပြီးရလာတဲ့ ဆေးရည်ကို ရေ အဆ ၁၀၀ နဲ့ ဆက်ဖျော်ရပါမယ်။
ရေလီတာ ၁၀၀ ကို ရေသန့်ပြုလုပ်လိုလျှင် ပထမအဆင့်မှာ ဖျော်လို့ရခဲ့တဲ့ ဆေးရည် ၁ လီတာကို ရေလီတာ ၁၀၀ ထဲသို့ ရောပေးရပါမယ်။
ရေလီတာ ၂၀၀ ကို ရေသန့်ပြုလုပ်လိုလျှင် ပထမအဆင့်မှာဖျော်လို့ရခဲ့တဲ့ ဆေးရည် ၂ လီတာကို ရေလီတာ ၂၀၀ ထဲသို့ ရောပေးရပါမယ်။
တိတိကျကျ ပြောရမယ် ဆိုရင်တော့ ပထမအဆင့်ဆေးရည် 1 pint ( အရည် ၁၆ အောင်စနဲ့ညီမျှတဲ့ 473 ml ) ကို ရေသန့်ပြုလုပ်မည့် ရေ ၁၂ ဂါလံခွဲ ( 56250 ml ) နဲ့ ရောပေးရတာပါ။
အကြမ်းဖျင်းတွက်နည်းသည် ဆေးဖျော်ရည် 500 ml ကို ရေသန့်ပြုလုပ်လိုသည့် ရေလီတာ ၅၀ ထဲသို့ ထည့်ဖျော်ရတာပါ။
ဒါကြောင့် အကြမ်းဖျင်း ပြောရလျှင် ပထမအဆင့်ဖျော်ရည် တဆ နဲ့ ရေသန့်ပြုလုပ်မည့် ရေ အဆ ၁၀၀ နဲ့ ရောပေးရတာပါ။ ၃ နာရီမှ ၅ နာရီခန့်ကြာလျှင် ရေသန့် အဖြစ် အသုံးပြုနိုင်ပါပြီ။ အနံ့ပြင်းလွန်းနေသေးလျှင် ရေ ကို တခြားပုံးထဲ သို့ ပြောင်းထည့်ပါ။ အချိန် အနည်းငယ် ထပ်စောင့်ပါ။ ဒါဆို မိမိတို့ ပတ်ဝန်းကျင် သို့မဟုတ် အိမ်တွင် သောက်ရေအဖြစ် အသုံးပြုနိုင်သော ရေသန့် ရပါပြီ။
အကျိုးရှိပါစေဟု ရည်သန်လျှက်
Dr. Fleming
https://www.epa.gov/ground-water-and-drinking-water/emergency-disinfection-drinking-water
